Өфө уҡыусыһы ҡытай теле буйынса Бөтә Рәсәй олимпиадаһында еңеү яуланы. Олимпиаданың йомғаҡлау этабы 7 апрелдән 11-нә тиклем Мәскәү дәүләт лингвистика университетында үтте.
Әғзәм Фәйзуллин исемендәге 39-сы гимназияның 8-се класс уҡыусыһы Лю Синьжань яҙма һәм телдән тур эштәрен уңышлы башҡарып, еңеүсе булды, тип хәбәр итә Өфө мэрияһы.
Ҡаланың мәғариф идаралығында уҡыусыны лайыҡлы еңеү менән ҡотланылар, шулай уҡ 39-сы гимназияның ҡытай теле уҡытыусыһы Ван Юнмейға рәхмәт белдерҙеләр.
Хәбәр иткәнебеҙсә, Башҡортостан уҡыусылары Бөтә Рәсәй уҡыусылар олимпиадаһында экология буйынса призерҙар булды.