Өфөлә юғалған балаларҙы эҙләгән ирекмәндәр яңы урынға күсеүе хаҡында хәбәр итте

Өфөлә юғалған балаларҙы эҙләү эштәре менән шөғөлләнгән «ЛизаАлерт» отряды ирекмәндәре яңы урынға күсеүе тураһында белдерҙе. Хәҙер эҙләү штабы Шәфиев урамындағы 12/2 -се йортта урынлашҡан.

«Шәфиев урамынан инергә, «Шервуд» торлаҡ комплексы ҡаршыһында (юл аша), ҡапҡанан үтеп, күрһәткестәргә ҡарап атларға кәрәк. Штабтың координаталары: 54.763860, 55.998624», — тиелә социаль селтәрҙәге төркөмдә.

Хәбәр итеүҙәренсә, ташҡынға бәйле «ЛизаАлерт» координаторҙары төндә ирекмәндәрҙе йәлеп итмәй, штаб көндөҙгө эш режимына күсә: көн һайын иртәнге 10-дан киске 10-ға тиклем.

18 йәше тулған өлкән ирекмәндәр кәрәк.

«Юғалған үҫмерҙәрҙе эҙләүҙә ярҙам күрһәтергә теләһәгеҙ, килегеҙ, көтәбеҙ, —тип мөрәжәғәт иттеләр улар яҙылыусыларға. — Кейем формаһы: урман. Уңайлы, йылы, һыу үткәрмәй торған аяҡ кейеме кәрәк. Үҙегеҙ менән телефон, ҡайнар эсемлек, фонарь  алығыҙ. Хәтерегеҙгә төшөрәбеҙ, сирләп торһағыҙ, эҙләү эшендә ҡатнашыу тыйыла! Үҙегеҙҙе һәм башҡаларҙы һаҡлағыҙ». 

Үҫмерҙәрҙең ҡайҙалығын беләһегеҙ икән, ЛизаАлерт отрядының тәүлек әйләнәһенә эшләгән ҡыҙыу линияһына мөрәжәғәт итегеҙ: 8(800)700-54-52 (бушлай) йәки 112.

Ошо көндәрҙә Башҡортостан Башлығы эҙләү штабына килеп, 30 мартта Өфө ҡалаһында юғалған уҡыусылар Павел Паличев менән Дамир Әҙеһәмовтың ата-әсәләре менән аралашты. Радий Хәбиров шулай уҡ эштәрҙе туҡтатмаҫҡа ҡушты.

https://www.bashinform.ru/news/social/2024-04-09/volontery-zanyatye-poiskom-propavshih-v-ufe-detey-soobschili-o-pereezde-3721431