Өфөлә өс дөйөм ҡала өмәһе ойошторола

Өфөләр март аҙағында уҡ ҡала биләмәләрендә тәртип урынлаштыра башланы — аҙна һайын санитар йомалар үткәрелә. Өфө мэрияһының матбуғат хеҙмәте мәғлүмәттәренә ярашлы, санитар таҙартыу һәм төҙөкләндереү айлығы 1 апрелдән 26 майға тиклем бара. Өс дөйөм ҡала өмәһе ойошторола. Беренсеһе был аҙнала, 6 апрелдә, була.

«Хәҙер тәү сираттағы бурыстар — ҡалған ҡарҙы таратыу һәм сүп-сарҙы йыйып алыу. Өмәләр ваҡытында ҡаланың ҡаты көнкүреш ҡалдыҡтары полигоны барлыҡ предприятиеларҙан һәм ойошмаларҙан сүп-сарҙы бушлай ҡабул итәсәк», — тип хәбәр иттеләр ҡала хакимиәтендә.

Билдәләнеүенсә, төрлө объекттарҙы ҡуртымға алыусылар һәм милекселәр эргә-тирәләге биләмәләрҙе, бигерәк тә «ҡыҙыл һыҙат»тағы участкаларҙы таҙа тоторға бурыслы.

«Һәр кем үҙ ихатаһында, яҡындағы урамда, скверҙа өмәләргә ҡушылырға мөмкин. Халыҡты, эшҡыуарҙарҙы ошо эштән ситтә ҡалмаҫҡа саҡырабыҙ. Күмәк көс менән ҡалабыҙҙы, урамдарҙы һәм ихаталарҙы тағы ла күркәмерәк итә алабыҙ», — тип белдерҙеләр Өфө мэрияһында.

https://www.bashinform.ru/news/social/2024-04-04/v-ufe-organizuyut-tri-obschegorodskih-subbotnika-3714331