Хәйбулла районында юлдарҙы һәм йорт яны биләмәләрен һыу баҫҡан

Хәйбулла районы хакимиәте башлығы Рөстәм Шәрипов үҙенең телеграм-каналында ауылдарҙа урамдарҙы, ихаталарҙы һыу баҫыу осраҡтары тураһында яҙған. Ул урындағы халыҡты һыуҙы һурҙырыуҙа ярҙам итергә саҡыра.

«Бөгөн төндә яуым-төшөмдөң күп булыуы райондың ҡайһы бер ауылдарында юлдарҙы, йорт яны ихаталарын һәм подвалдарҙы һыу баҫыуға килтерҙе. Халыҡтан мөрәжәғәттәр күп, ярҙам итәбеҙ. Әлеге ваҡытта урындарҙа ташҡын эҙемтәләре бөтөрөлә. Район халҡын бөтә хәүефһеҙлек сараларын үтәргә, күмәк көс менән ҡулдан килгәнсә ташҡынға ҡаршы торорға саҡырабыҙ», — тип яҙған ул.

Бынан алдараҡ «Башинформ» Башҡортостан йылғаларында боҙ тығынын вертолет һәм пилотһыҙ осоусы аппараттар ярҙамында асыҡлауҙары тураһында хәбәр иткәйне.

https://www.bashinform.ru/news/social/2024-03-27/v-haybullinskom-rayone-bashkirii-podtopilo-dorogi-i-pridomovye-territorii-3703614