Радий Хәбиров «Именлек» геронтология үҙәгенең яңы корпусы тураһында һөйләне

Башҡортостан Башлығы Радий Хәбиров социаль селтәрҙәге сәхифәһендә Өфөлә «Именлек» геронтология үҙәгенең яңы корпусы 45% әҙер булыуын хәбәр итте. Республика етәксеһе «Демография» милли проекты сиктәрендә Рәсәй Президенты ҡарары буйынса төҙөлөп ятҡан объектты төбәктә иң мөһимдәренең береһе тип билдәләне.

«Әле бинаның алғы яғында эштәр башланды. Был ҡарттар йорто ғына түгел, ә өлкән йәштәгеләр өсөн уңайлы пансионат. Бында медицина блогы, дауалау-хеҙмәт реабилитацияһы бүлексәләре өсөн дә урын табылыр. Проектта ҡышҡы баҡса, йәйге веранда, мөмкинлектәре сикле кешеләр өсөн лифт һәм бассейн күҙ уңында тотола», — тип яҙҙы ул.

Хәбиров һүҙҙәренсә, Башҡортостанда күптәр яңы корпусты бик көтә, сөнки барыһының да үҙ ҡартлығын яҡындары менән ҡаршы алырға мөмкинлеге юҡ.

«Ололарҙың ниндәй сәбәптәр менән ошондай социаль учреждениеларҙа йәшәргә мәжбүр булыуына ҡарамаҫтан, беҙҙең бурыс — улар өсөн һәйбәт, лайыҡлы шарттар булдырыу», — тип билдәләне республика Башлығы.

https://www.bashinform.ru/news/social/2024-02-29/radiy-habirov-rasskazal-o-novom-korpuse-gerontologicheskogo-tsentra-imenlek-3662212