Саҡмағош районында йөҙйәшәр инәй 105 йәшлек юбилейын билдәләй

Саҡмағош районының Киндеркүл ауылында йәшәгән Бөйөк Ватан һуғышы ветераны, тыл эшсәне Әминә Хәйбрахманова 105 йәшен билдәләй. Йөҙйәшәр инәйҙе тыуған көнө менән хакимиәт башлығы Реканс Ямалиев тәбрикләне.

«Яңы ғына бер быуатлыҡ юбилейында булғайным, биш йыл ғүмер үтеп тә киткән. Ул беҙҙе ныҡ көткән, ҡунаҡтар килеүенә ихлас ҡыуанды. Һәр кемдең һаулығы, тыныслыҡ, именлек өсөн доға ҡылды. Ошо йәшендә лә Әминә инәйҙең зиһене асыҡ, хәтере шәп», - тип яҙа район етәксеһе социаль селтәрҙәге сәхифәһендә.

Әминә Ғиниәтулла ҡыҙы өлөшөнә һуғыш йылдары, һуғыштан һуң илде тергеҙеү осоро тура килә. Ул ғүмере буйына колхозда эшләй. Хәләл ефете менән алты бала тәрбиәләп үҫтергән, «Герой-әсә» исеменә лайыҡ булған. Юбиляр үҙенең тыуған көнөн өс балаһы, 15 ейән-ейәнсәре, 30 бүлә-бүләсәре һәм 8 тыуа-тыуасары менән ҡаршылай.

Хәтерегеҙгә төшөрәбеҙ, «Башинформ» Өфөлә Мария Чернованың 105 йәшен билдәләүе тураһында хәбәр иткәйне.

https://www.bashinform.ru/news/social/2024-02-28/dolgozhitelnitsa-chishminskogo-rayona-bashkirii-prazdnuet-105-letniy-yubiley-3660597