Башҡортостанда парктарҙы һәм скверҙарҙы федераль программа буйынса үҙгәртеп ҡороу 1 майҙан башлана

Башҡортостанда Владимир Путиндың тәҡдиме менән башланған «Торлаҡ һәм ҡала мөхите» милли проектының «Уңайлы ҡала мөхитен булдырыу» программаһы буйынса йәмәғәт биләмәләрен төҙөкләндереү эштәре 2024 йылдың 1 майынан башлана. 1 апрелгә сауҙалашыуҙар тамамланырға тейеш. Республика етәксеһе үҙенең телеграм-каналында ошо хаҡта белдерҙе.

Быйыл 123 йәмәғәт биләмәһе яңыртыла, 67 объект – ҡалаларҙа, 56-һы иһә ауылдарҙа, тип иҫкә төшөрҙө Радий Хәбиров. Барлыҡ проекттарҙы ла халыҡ былтыр яҙ көнө онлайн-тауыш биреү ярҙамында һайланы.

Ҡайһы бер парктар һәм скверҙар тулыһынса яңыртыла. Өфөнөң Урмансылар паркын күләмле реконструкция көтә. Биләмәләрҙең бер өлөшөндә төҙөкләндереү эштәре алдан уҡ башланғайны. Мәҫәлән, Мәләүездә быйыл «Дан» мәҙәниәт һәм ял паркында эштәр дауам итә.

«Мин республика буйлап күп йөрөйөм, сағыштырырлыҡ нәмәләр бар. Беҙҙең ҡалалар һәм ауылдар үҙгәрә, яңы парктар, аллеялар, скверҙар барлыҡҡа килә, халыҡтың яратҡан ял урындары күркәмләнә. Һуңғы биш йылда «Уңайлы ҡала мөхитен булдырыу» программаһы буйынса Башҡортостанда 683 объектты төҙөкләндерҙек. Проект өсөн бүленгән 7 миллиард һумдың 91% – федераль бюджеттан. Ә был карточкаларҙа – быйыл ғәмәлгә ашырылырға тейешле проекттар. Минеңсә, бик шәп», – тип билдәләне Башҡортостан Башлығы.

https://www.bashinform.ru/news/social/2024-02-13/v-bashkirii-parki-i-skvery-po-federalnoy-programme-nachnut-preobrazhat-s-1-maya-3641528