Рәсәйҙә махсус хәрби операцияға ебәрелгән техниканы теркәү өсөн дәүләт пошлинаһы бөтөрөлә

Дәүләт Думаһына махсус хәрби операция биләмәһенә оҙатылған техниканы теркәү өсөн дәүләт пошлинаһын бөтөрөү йәһәтенән Һалым кодексына төҙәтмәләр индереүҙе күҙ уңында тотҡан закон проекты тәҡдим ителде.

Федерация Советы рәйесенең беренсе урынбаҫары Андрей Турчак үҙенең телеграм-каналында яҙыуынса, һүҙ яугирҙәрҙә тапшырылған автомобилдәр, бәләкәй суднолар һәм башҡа транспорт саралары хаҡында бара. Әлеге ваҡытта бындай техниканы иҫәпкә ҡуйыу өсөн байтаҡ аҡса кәрәк.

Һалым кодексына төҙәтмәләр көсөнә ингәс, ошондай транспортты бушлай иҫәпкә ҡуйырға мөмкин. Был дәүләт номерҙарын, ПТС, милеккә хоҡуҡ тураһында таныҡлыҡ һәм башҡа бер нисә документтарҙы теркәүгә, биреүгә ҡағыла.

Бынан алдараҡ «Башинформ» республикабыҙҙан махсус хәрби операция биләмәһенә 108-се гуманитар ылауҙың юлға сығыуы тураһында хәбәр иткәйне.

https://www.bashinform.ru/news/svo/2024-01-30/v-rossii-otmenyat-gosposhlinu-za-registratsiyu-tehniki-peredannoy-na-svo-3622610