Ир йәки ҡатындың береһенең енесен үҙгәртеүе никахты тарҡатыу өсөн нигеҙ булып тора

Никахты өҙөү өсөн нигеҙҙәр исемлеген киңәйтергә тәҡдим иткән «Башҡортостан Республикаһының Ғаилә кодексына үҙгәрештәр индереү тураһында» закон проекты Башҡортостан Дәүләт Йыйылышы - Ҡоролтайҙың пленар ултырышында беренсе уҡыуҙа ҡабул ителде.

Хәтерегеҙгә төшөрәбеҙ, закон проектын Дәүләт Йыйылышының һаулыҡ һаҡлау, социаль сәйәсәт һәм ветерандар эштәре буйынса комитеты әҙерләгән. Ул конституция тарафынан бирелгән хоҡуҡтарҙы, йәмғиәттең әхлаҡи һәм ғаилә нигеҙҙәрен яҡлауға йүнәлтелгән.

Тәҡдим ителгән төҙәтмәләр Рәсәй Федерацияһының Ғаилә кодексына индерелгән һуңғы үҙгәрештәр менән бәйле, тип билдәләне комитет рәйесе Салауат Харасов.

– Федераль законға ярашлы, гражданлыҡ торошо актына ир йәки ҡатындың береһенең енесен үҙгәртеүе тураһында яҙыуы никахты өҙөү өсөн нигеҙ булып тора, – тине депутат. – Енесен үҙгәрткән кешеләргә балаларҙы уллыҡҡа (ҡыҙлыҡҡа) алыу, шулай уҡ уларҙың опекундары булыу тыйыла.

Бынан тыш, икенсе тормош иптәшенән (элекке тормош иптәшенән) суд тәртибендә алимент түләтеүҙе талап итеү хоҡуғы тураһында положениеларға үҙгәрештәр индерелде.

https://www.bashinform.ru/news/social/2024-01-25/smena-pola-odnim-iz-suprugov-stanet-osnovaniem-dlya-rastorzheniya-braka-3617177