Республика Башлығы Миҙхәт Шакировтың хәтерен мәңгеләштереү буйынса тәҡдимде хупланы

Тарихсы Рәмил Рәхимов күп йылдар республикаға етәкселек иткән Миҙхәт Закир улы Шакировтың хәтерен мәңгеләштереү тәҡдиме менән сығыш яһаны. Башҡортостан Башлығы Радий Хәбиров уны Салауат Юлаев ордены менән бүләкләгәндән һуң ул Миҙхәт Шакировҡа һәйкәл ҡуйыу тураһында идеяһын әйтте.

«Ул етди етәксе, тап ул эшләгән йылдарҙа Башҡортостанда заводтар, башҡа мөһим предприятиелар, торлаҡ комплексы, хөкүмәтебеҙ һәм республика хакимиәте бинаһы, «Башҡортостан» дәүләт концерт залы төҙөлдө, колхоздар, совхоздар гөрләп эшләне, мәҙәниәт һәм фән үҫеште. Шундай кешенең иҫтәлеген мәңгеләштереү, Өфөлә уға һәйкәл ҡуйыу өҫтөндә уйларға кәрәк. Был бик яҡшы булыр ине», - тип үҙенең фекере менән уртаҡлашты ул.

Башҡортостан Башлығы тәҡдимде хупланы. Быйыл йыл аҙағында билдәле сәйәси эшмәкәр Миҙхәт Шакиров йәшәгән йорт янында һәйкәл асырға әҙерләнәбеҙ, тип билдәләне Радий Хәбиров.

Белешмә

Миҙхәт Шакиров (1916-2004) — совет дәүләт һәм партия эшмәкәре, 1969-1987 йылдарҙа КПСС-тың Башҡортостан өлкә комитетының беренсе секретары. Социалистик Хеҙмәт Геройы.

https://www.bashinform.ru/news/social/2024-01-22/istorik-ramil-rahimov-nagrazhden-ordenom-salavata-yulaeva-3612241