«Башҡортостан» дәүләт телерадиокомпанияһы журналисы Ришат Миндияров вафат

Өфөлә журналист, «Башҡортостан» дәүләт телерадиокомпанияһының радиотапшырыуҙар хеҙмәте етәксеһе Ришат Миндияров вафат булған. Был турала телеканал коллективы хәбәр итте.

Ришат Фәтхинислам улы ғүмерен журналистикаға бағышланы, оҙаҡ йылдар яратҡан һөнәренә тоғро хеҙмәт итте.

Радиола 1991 йылда, Башҡорт дәүләт университетының өсөнсө курсында уҡып йөрөгәндә үк эшләй башлай . «Радио-2» каналын (хәҙерге «Юлдаш») ойоштороуҙа ҡатнаша, башҡорт телендә тапшырыуҙар алып бара. Төрлө йылдарҙа БСТ каналында «Сәләм» тапшырыуының авторы һәм алып барыусыһы, республиканың төп телеканалында мәғлүмәт тапшырыуҙарының башҡорт редакцияһының баш мөхәррир була. 2016 йылда Бөтә Рәсәй дәүләт телерадиокомпанияһына эшкә күсә. «Рәсәй Башҡортостан радиоһы»нда - «Акценты недели» һәм «Рәсәй 1 Башҡортостан» телеканалында «Хәйерле иртә, республика!» тапшырыуҙарын алып барҙы.

«Уның көтмәгәндә арабыҙҙан китеүе - барыбыҙ өсөн дә оло юғалтыу. «Башҡортостан» дәүләт телерадиокомпанияһы коллективы Ришат Фәтхинислам улының туғандарының һәм яҡындарының ауыр ҡайғыһын уртаҡлаша. Уның хаҡында йылы хәтирәләр беҙҙең күңелдәрҙә мәңге һаҡланыр», - тиелә рәсми хәбәрҙә.

Мәрхүм менән хушлашыу урыны һәм ваҡыты һуңыраҡ билдәле була.

«Башинформ» мәғлүмәт агентлығы коллективы Ришат Миндияровтың туғандарының, яҡындарының һәм дуҫтарының ауыр ҡайғыһын уртаҡлаша.

https://www.bashinform.ru/news/social/2023-12-28/v-ufe-skoropostizhno-skonchalsya-zhurnalist-gtrk-bashkortostan-rishat-mindiyarov-3584906