Республиканың баш ҡалаһында барыһы ла өлгөлө булырға тейеш - Башҡортостан Башлығы

Башҡортостан Башлығы Дәүләт Йыйылышына мөрәжәғәтнамәһендә билдәләүенсә, республика өсөн үтә яуаплы йыл яҡынлашып килә. Киләһе йылда баш ҡаланың 450 йыллығы билдәләнә.

«Яратҡан Өфөбөҙҙө төҙөкләндереүгә айырым иғтибар бүлербеҙ. Әйткәнемсә, ҙур спорт объекттары, яңыртылған поликлиникалар, «Көнсығыш сығыу юлы», «Салют» балалар һәм үҫмерҙәр өсөн реабилитация үҙәге, Балалар онкологияһы һәм гематологияһы үҙәге, яңыртылған Ҡурсаҡ театры ҡалабыҙға шәп бүләк булыр тип уйлайбыҙ. Өфөнөң юбилейы сиктәрендә Рәсәй һәм сит ил ҡунаҡтары ҡатнашлығында бик күп фестивалдәр, форумдар, концерттар, конкурстар һәм күргәҙмәләр ойошторола. Республиканың баш ҡалаһында юлдар, ихаталар, социаль объекттар, иҫтәлекле урындар, парктар һәм башҡалар өлгөлө булырға тейеш, тип күп тапҡыр әйткәнем булды. Был бит Башҡортостандың йөҙө. Шуға күрә юбилей йылында Өфөгә айырыуса иғтибар бүлербеҙ», - тине Радий Хәбиров.

2024 йыл республикабыҙҙа спорт һөйөүселәр өсөн дә әһәмиәтле булыр, тине төбәк етәксеһе. Киләһе йылда Өфөнөң 450 йыллығы уңайынан көрәш, фехтование, ишкәкле слалом үҙәктәре асыла. Өфөлә илдең «Рәсәй – спорт державаһы» төп спорт форумы үткәрелә.

- Беҙ президент Владимир Путинға ошондай ҡарары өсөн рәхмәтлебеҙ. Был - оло мәртәбә һәм спортсыларыбыҙҙың ҡаҙаныштарын таныу, - тип билдәләне Радий Хәбиров.

https://www.bashinform.ru/news/social/2023-12-19/radiy-habirov-v-poslanii-rasskazal-o-blagoustroystve-ufy-k-450-letiyu-3573467