Башҡортостанда 2024 йыл — Һаулыҡ мөмкинлектәре сикләнгән кешеләр хаҡында хәстәрлек йылы

Башҡортостан Башлығы Радий Хәбиров бөгөн республика Дәүләт Йыйылышына йыллыҡ Мөрәжәғәтнамәһендә киләһе йылды Һаулыҡ мөмкинлектәре сикләнгән кешеләр тураһында хәстәрлек йылы тип билдәләргә тәҡдим итте.

«Беҙ инвалид бала тәрбиәләгә ғаиләләргә, хеҙмәт йәшендәге инвалидтарға ярҙам күрһәтеүгә, уларға эшкә урынлашырға, һөнәри белем алырға булышлыҡ итергә, уңайлы мөхит, социаль инфраструктура, реабилитация һәм социализация системаларын булдырыуға етди иғтибар бүлербеҙ. Ғөмүмән, был мәсьәләләрҙе комплекслы хәл итергә кәрәк. Беҙҙең бурыс – мөмкинлектәре сиклеләрҙең йәшәү сифатын күтәреү. Хөкүмәттән тейешле саралар планын әҙерләүҙәрен һорайым», - тине Радий Хәбиров.

Республика етәксеһе һүҙҙәренсә, башта норматив-хоҡуҡи база өҫтөндә ныҡлап эшләргә кәрәк.

Республиканың Хеҙмәт министрлығы мәғлүмәттәренә ярашлы, әлеге ваҡытта Башҡортостанда 250 меңдән ашыу инвалид йәшәй, уларҙың 93 меңгә яҡыны — хеҙмәт йәшендә.

https://www.bashinform.ru/news/social/2023-12-19/2024-god-v-bashkirii-budet-godom-zaboty-o-lyudyah-s-ovz-3572919