Путин Краснодар аэропортын асыу ихтималлығы тураһында белдереүгә аңлатма бирҙе

Рәсәй Президенты Владимир Путин Краснодар аэропортын асыу ихтималлығы тураһында хәбәргә үҙ фекерен әйтте.

13 декабрҙә федераль киң мәғлүмәт сараларында Краснодар аэропортын асыу ихтималлығы хаҡында мәғлүмәт баҫылып сыҡты. Хәбәр ителеүенсә, йома, 15 декабрҙә, һынау рейсын башҡарыу күҙаллана, уның һөҙөмтәләре буйынса авиабәйләнеште асыу мөмкинлеге тураһында ҡарар ҡабул ителергә тейеш.

Дәүләт башлығы «Владимир Путин менән йыл йомғаҡтары» программаһында билдәләүенсә, аэропортты асыу өсөн төп шарт — именлекте тәьмин итеү.

«Аэропортты асыу тураһында мәсьәләне хәл иткәндә пассажирҙарҙың хәүефһеҙлеген тәьмин итеү төп талап булып тора. Был Краснодар аэропортына ла ҡағыла. Ул хәрби хәрәкәттәр зонаһынан алыҫта урынлашһа ла. Оборона министрлығының шундай йөкләмәһе бар — даими анализларға һәм аҙаҡтан ҡарар ҡабул итергә. Әгәр улар шундай ҡарар ҡабул итергә әҙерләнә икән, миңә әйтерҙәр. Ләкин тағы бер тапҡыр анализларға кәрәк», — тип белдерҙе Владимир Путин.

https://www.bashinform.ru/news/social/2023-12-14/putin-prokommentiroval-zayavlenie-o-vozmozhnom-otkrytii-aeroporta-krasnodara-3566175