Күсмә цивилизациялар музейының визит үҙәге 2024 йылда асыласаҡ

«Тура бәйләнеш» барышында Пумка исеме менән билдәле тревел-блогер Анна Желякова Радий Хәбировтан республиканың Шишмә районында төҙөлөп ятҡан Евразия күсмә цивилизациялар музейы хаҡында һораны.

Радий Хәбиров һүҙҙәренсә, буласаҡ музейҙың визит үҙәге киләһе йылдың май-июнь айҙарында асылырға тейеш. Шулай уҡ был ваҡытҡа Турахан кәшәнәһенә илткән ағас экоһуҡмаҡ та һалынасаҡ.

«Был ғәйәт ҙур проект, 10 мең квадрат метрлыҡ майҙандағы музейҙы үҙ эсенә аласаҡ, беҙ унда төрлө симпозиумдар үткәрергә, фәнде үҫтерергә, һуңынан үҙенең тимерлеге, умарталығы, оҫтаханаһы булған Башҡорт аты үҙәген һәм Этноауыл асырға йыйынабыҙ. Шулай уҡ кәшәнә янындараҡ спа-отель төҙөргә тигән ниәтебеҙ бар», - тип һөйләне республика етәксеһе.

Шул уҡ ваҡытта төҙөлөштө тамамлауҙың аныҡ ваҡытын әйтеүе ҡыйыныраҡ, тине ул.

«Аҡса кәрәклеге аңлашылып тора һәм беҙ шунан сығып эш итәбеҙ. Комплексты тамамлау өсөн яҡынса 5 йыл кәрәк».

https://www.bashinform.ru/news/social/2023-11-29/vizit-tsentr-buduschego-muzeya-kochevyh-tsivilizatsiy-otroetsya-uzhe-v-2024-godu-3545189