Башҡортостанда йәшәүселәр Радий Хәбировҡа ихатаға ремонт яһауҙы һорап мөрәжәғәт итте

«Тура бәйләнеш» барышында Бүздәк ауылында йәшәүселәр Башҡортостан Башлығы Радий Хәбировтан «Башҡорт ихаталары» программаһы буйынса үҙҙәренең ихатаһын ремонтлауҙы һораны.

«Хөрмәтле Радий Фәрит улы, һеҙгә Бүздәк ауылының Баҡса урамында йәшәүселәр мөрәжәғәт итә. Беҙҙе биш күп фатирлы йорттан торған ихатабыҙҙың биләмәһен төҙөкләндереү мәсьәләһе борсой. Ихатабыҙ аяныс хәлдә. Эргәләге Киров, Вокзал һәм башҡа урамдарҙа ихаталар төҙөкләндерелде, ә беҙҙеке ситтә ҡалды», - тине улар.

Башҡортостан Башлығы республиканың торлаҡ-коммуналь хужалыҡ министры Ирина Головановаға ошо ихатаға иғтибар итергә һәм уны 2024 йылғы планға индерергә ҡушты.

«Ихата 2024 йылда эшләнергә тейеш. Әйҙәгеҙ, уйлап ҡарайыҡ әле, ихаталарға финанслауҙы арттырыу мөмкинлеге бармы икән? Бик яҡшы һәм файҙалы программа. Былтыр ҙа, быйыл да ошо программаны һаҡлап ҡалдыҡ. 2025-2026 йылдарҙа «Башҡорт ихаталары» программаһына аҡса өҫтәрбеҙ. Ирина Александровна, финанс министрлығында ныҡышмалылыҡ күрһәтегеҙ», - тине Радий Хәбиров.

https://www.bashinform.ru/news/social/2023-11-29/zhiteli-bashkirii-obratilis-k-radiyu-habirovu-s-prosboy-o-remonte-dvora-3545184