Республикала хәрби хәрәкәттәр инвалидтарына өйҙә бушлай социаль хеҙмәттәр күрһәтелә

Башҡортостанда хәрби хәрәкәттәр инвалидтары өйҙә бушлай социаль хеҙмәттәр менән файҙаланыу хоҡуғына эйә. Дәүләт Йыйылышы депутаттары  һуңғы уҡыуҙа тейешле закон проектын ҡабул итте.

Республика парламенты рәйесе Константин Толкачев һүҙҙәренсә, бында өйҙө йыйыштырыу, кер йыуыу, гигиена процедуралары, аш-һыу әҙерләү, хаттар ебәреү һәм башҡалар инә.

«Бындай ярҙам теге йәки был сәбәптәр (имгәнеү, ауырыу, инвалидлыҡ) арҡаһында үҙ-үҙен хеҙмәтләндерә, үҙ аллы йөрөй алмағандарға кәрәк. Мәҫәлән, хәрби хәрәкәттәр инвалидтары ла шундайҙар иҫәбендә. Закон хәрби йәрәхәт һөҙөмтәһендә инвалид булып ҡалған яугирҙәрҙе комплекслы социаль яҡлау өсөн ҙур әһәмиәткә эйә», — тип билдәләне ул.

Бөйөк Ватан һуғышы инвалидтарына һәм унда ҡатнашыусыларға, «Блокадалы Ленинградта йәшәүсе» һәм «Ҡамауҙа ҡалған Севастополдә йәшәүсе» билдәләре менән бүләкләнгәндәргә, Бөйөк Ватан һуғышы осоронда һауа һөжүменә ҡаршы оборона, һауа һөжүменә ҡаршы урындағы оборона объекттарында, һаҡланыу ҡоролмалары, хәрби-диңгеҙ базалары, аэродромдар һәм башҡа хәрби объекттар төҙөлөшөндә эшләгәндәргә лә ошондай ярҙам күрһәтелә.

https://www.bashinform.ru/news/social/2023-11-24/invalidam-boevyh-deystviy-v-bashkirii-okazhut-besplatnye-sotsuslugi-na-domu-3535555