Башҡортостандан популяр эстрада йырсылары Ришат Төхвәтуллин һәм Әлиә Ҡарасурина тиҙҙән ата-әсә булырға әҙерләнә. Был хаҡта Әлиә үҙенең блогында хәбәр итте.
«Беҙ һине көтәбеҙ, сабыйыбыҙ, — тип яҙа ул. — Һәр нәмәнең үҙ ваҡыты бар. Ҡайһы бер кешеләр һиҙгән булып, әллә нимәләр яҙһалар ҙа, мин үҙ теләгем менән, үҙ ваҡытында һөйләргә булдым. Хәҙер инде йәшерәһе юҡ».
Хәтерегеҙгә төшөрәбеҙ, йәштәр быйыл сәстәрен сәскә бәйләне. Апрелдә ғашиҡтар никах уҡытһа, ә июнь айында гөрләтеп туй үткәрҙе.
Ришат Төхвәтуллин Башҡортостандың Туймазы районы Ҡарамалы-Ғөбәй ауылында тыуып үҫкән, Өфө сәнғәт институтын тамамлаған. Әлиә Ҡарасурина — Дүртөйлө районының Шишмә ауылынан, Ҡазан мәҙәниәт һәм сәнғәт университетында белем алған. Ришат менән бер коллективта эшләй, дуэт йырлай.