Башҡортостан Газа секторының тыныс халҡына гуманитар ылау ебәрергә әҙерләнә

Башҡортостан Башлығы Радий Хәбиров социаль селтәрҙәге сәхифәһендә республиканың Палестинаның тыныс халҡына гуманитар ярҙам ебәрергә йыйыныуы хаҡында хәбәр итте.

«Башҡортостан һәр ваҡыт яфа сигеүселәргә һәм мохтаждарға ярҙам ҡулы һуҙа. Йылдар буйына Донбасс халҡына ярҙам иттек, Сүриәгә гуманитар ылау оҙаттыҡ, ҡотҡарыусыларыбыҙ Төркиәлә ер тетрәүҙән күреүселәрҙе емереклектәр аҫтынан сығарҙы, республикабыҙ табиптары ковид осоронда Ҡырғыҙстанда һәм Абхазияла сирлеләрҙе дауаланы. Әлбиттә, бөгөн беҙ Палестинала йәшәгән тыныс халыҡтың яҙмышына битараф ҡала алмайбыҙ. Башҡортостанда күптәр беҙгә «Уларға нисек ярҙам итергә мөмкин?» тигән һорауҙар менән мөрәжәғәт итә. Уларға мотлаҡ ярҙам күрһәтербеҙ», - тип билдәләне Радий Хәбиров.

Ул Айнур хәҙрәт Бирғәлин менән Газаға гуманитар йөк (дарыуҙар, кейем-һалым һәм аҙыҡ-түлек) оҙатыу тураһында һөйләшеүҙәрен хәбәр итте һәм республика халҡын ошо изге эшкә ҡушылырға саҡырҙы.

«Республика халҡына, мосолмандарға һәм ғүмерҙәренә хәүеф янаған балаларға, ҡатын-ҡыҙҙарға, ҡарттарға ҡулынан килгәнсә ярҙам итергә әҙер булғандарҙың һәммәһенә лә мөрәжәғәт итәм. Кәрәк-яраҡтарҙы бер майҙансыҡта – барыһына ла билдәле «Башсельхозтехника» логистика үҙәгендә йыйырға тигән тәҡдим индерәм», - тип яҙҙы Радий Хәбиров.

https://www.bashinform.ru/news/social/2023-11-02/bashkiriya-otpravit-gumanitarnuyu-pomosch-naseleniyu-gazy-3503790