Башҡортостан Башлығы Радий Хәбиров Тәлғәт Тажетдинды 75 йәше тулыуы менән ҡотланы

Юғары мөфтөй, Рәсәй мосолмандарының Үҙәк диниә назараты рәйесе, шәйех-әл-ислам Тәлғәт хәҙрәт Тажетдин 75 йәшен билдәләй. Башҡортостан Башлығы Радий Хәбиров үҙенең социаль селтәрҙәге сәхифәһендә дин әһеленә юбилейы айҡанлы ҡотлау һүҙҙәрен еткерҙе.

«Тәлғәт хәҙрәт — беҙҙең, тотош Рәсәй һәм сит илдәр өсөн рухи лидер, аҡыллы остаз, ысын илһөйәр һәм абруйлы шәхес. Ярты быуатҡа яҡын Юғары мөфтөй илдең мосолман өммәтен берләштереүгә, дин-ара һәм дәүләт-конфессия хеҙмәттәшлеген үҫтереүгә баһалап бөткөһөҙ өлөш индерә», — тип билдәләне республика Башлығы.

Башҡортостан — Рәсәйҙәге исламдың танылған тарихи һәм заманса үҙәге, тине Радий Хәбиров. Тәлғәт Тажетдин етәкселегендәге Рәсәй мосолмандарының Үҙәк диниә назараты 22 төбәк диниә назаратын һәм ике меңдән ашыу мосолман ойошмаһын берләштерә. Ислам традицияларын һаҡлауға булышлыҡ итә, йәштәргә әхлаҡи йүнәлеш бирә, ғаилә ҡиммәттәрен нығыта, илһөйәрлек тәрбиәләй. Рәсәй мосолмандарының Үҙәк диниә назараты тырышлығы менән бик күп төбәктәрҙә йөҙҙәрсә мәсет төҙөлдө. Өфөлә Рәсәй ислам университеты булдырылды, былтыр Тәлғәт Тажетдин менән бергә уның яңы заманса корпустарын асыу тантанаһы уҙҙы.

«Хөрмәтле Тәлғәт хәҙрәт, ысын күңелдән юбилейығыҙ менән ҡотлайым! - тип яҙҙы Башҡортостан Башлығы. - Барыбыҙ ҙа һеҙҙе кешелекле, тыныслыҡ урынлаштырыусы, юғары әхлаҡи сифаттарға эйә кеше, шәп оратор, ислам диненә өндәүсе тип беләбеҙ. Рәхмәт һеҙгә. Ныҡлы һаулыҡ һәм именлек теләйем!»

https://www.bashinform.ru/news/social/2023-10-12/glava-bashkirii-radiy-habirov-pozdravil-predsedatelya-tsdum-rossii-talgata-tadzhuddina-s-75-letiem-3475808