Мәләүез районының Һарыш ауылында яңы ФАП сафҡа индерелде

Мәләүез районында һаулыҡ һаҡлауҙың беренсел звеноһын үҫтереү дауам итә. Һарыш ауылында «Һаулыҡ һаҡлау» милли проектының «Башҡортостан Республикаһында һаулыҡ һаҡлауҙың беренсел звеноһын яңыртыу» төбәк программаһы ярҙамында яңы фельдшер-акушерлыҡ пункты асылды, тип хәбәр итә «Октябрь юлы» гәзите.

Заманса, уңайлы, көтөп алдыҡ – тап шулай ти Һарыш ауылында йәшәүселәр яңы фельдшер-акушерлыҡ пункты тураһында. Модулле ФАП ҡыҫҡа ғына ваҡыт эсендә төҙөлгән һәм заманса стандарттар буйынса йыһазландырылған. Унда пациенттарҙың көтөү урыны, ҡарау, процедура кабинеттары, санузел бар, заманса медицина ҡорамалдары менән тәьмин ителгән. Яңы фельдшер-акушерлыҡ пунктында юғары квалификациялы фельдшер Рәмзилә Ғабдуллина эшләй, уның ошо ауылда хеҙмәт стажы – 32 йылдан ашыу.

Әйткәндәй, Һарыш, Сухаревка һәм Антоновка ауылдары фельдшер-акушерлыҡ пункттары өсөн осраҡлы һайланмаған, сөнки әлеге ауылдар район үҙәгенән алыҫта урынлашҡан. Мәләүез районында яңы һаулыҡ һаҡлау объекттарының барлыҡҡа килеүе мөһим әһәмиәткә эйә, хәҙер төпкөл ауылдарҙа ла сифатлы медицина ярҙамын ваҡытында күрһәтеү мөмкинлеге бар.

https://www.bashinform.ru/news/social/2023-10-10/v-derevne-saryshevo-meleuzovskogo-rayona-otkrylsya-novyy-fap-3473963