Башҡортостандан «Алтын көҙ» күргәҙмәһендә ҡатнашыусылар тәүге алтын миҙалдар яуланы

Мәскәүҙә Тимирязев исемендәге Рәсәй дәүләт аграр университеты майҙансығында XXV «Алтын көҙ» Рәсәй агросәнәғәт күргәҙмәһе бара. Башҡортостандың Ауыл хужалығы министрлығынан хәбәр итеүҙәренсә, республикабыҙ ҡатнашыусылары традицион тармаҡ конкурстарында тәүге наградаларға лайыҡ булды.

Башҡортостан фермерҙары Рауил Ғәфүров һәм Булат Фархшатов алтын миҙалдар менән бүләкләнде. Улар үҫемлекселек һәм малсылыҡ продукттары етештереүҙә, шулай уҡ үҙенсәлекле «Агростартап» проектын тормошҡа ашырыуҙа өлгәшкән ҡаҙаныштары өсөн билдәләнде.

Шулай уҡ республиканың Фермерҙарға һәм ауыл хужалығы кооперацияларына ярҙам итеү өлкәһендә компетенциялар үҙәге (Ауыл хужалығын консультациялау үҙәге) алтын миҙал алды.

«Алтын көҙ» агрокүргәҙмәһе — Рәсәйҙең агросәнәғәт комплексында төп ваҡиға. Бында тармаҡтың үҫемлекселек һәм малсылыҡ, техник һәм фәнни үҫеш өлкәһендәге төп ҡаҙаныштары тәҡдим ителә. Быйылғы күргәҙмә 25-се тапҡыр ойошторола. Уның дөйөм майҙаны — 12 мең квадрат метр, экспозициялар академияның уҡыу корпустарында һәм асыҡ майҙансыҡтарында урынлаштырылған. Йөҙгә яҡын экспонент — төбәктәр һәм агросәнәғәт комплексы ойошмалары ҡатнаша. Күргәҙмә 7 октябргә тиклем эшләй.

https://www.bashinform.ru/news/social/2023-10-05/uchastniki-vystavki-zolotaya-osen-iz-bashkirii-poluchili-pervye-zolotye-medali-3467340