Башҡортостан Башлығы Радий Хәбиров 2 сентябрҙә Башҡорт дәүләт ҡурсаҡ театрын реконструкциялау барышын тикшерҙе. Быйыл йыл аҙағында уҡ йәш тамашасылар ҡурсаҡ театрының тәүге спектаклдәрен ҡарай ала, тип хәбәр итте ул.
«Төҙөкләндереү эштәре барған ҡурсаҡ театрының төп залынан сер итеп кенә әйтәм. Йыл һуңында балаларҙы ошонда көтөп ҡалабыҙ», - тип белдерҙе Радий Хәбиров үҙенең телеграм-каналында.
Башҡорт дәүләт ҡурсаҡ театрының майҙаны реконструкциянан һуң 2,5 тапҡырға — 6,4 мең квадрат метрға тиклем киңәйтелә, ә тамашасы өсөн урындар 300-ҙән алып 435-кә тиклем арттырыла, тип хәбәр иткәйне Радий Хәбиров. Әлеге ваҡытта объектта эшселәр төкәтмә төҙөй башланы, тип яҙғайны «Башинформ».