Республикала 1 сентябрҙә 17 меңгә яҡын уҡыусы капиталь ремонтланған мәктәптәргә бара

Башҡортостанда мәктәптәрҙе капиталь ремонтлау тамамлана. Быйылғы миҙгелдә 28 муниципалитетта 77 бина яңыртылған. Был мәктәптәрҙә 1 сентябрҙән 17 мең самаһы бала уҡый башлай.

Уҡыу йылы башланғансы тиклем бөтә эштәр, мәктәптәрҙе яңы ҡорамалдар менән йыһазландырыуҙы иҫәпкә алып, тамамланырға тейеш. Ҡайһы бер мәктәптәрҙә улар тамамланған: ремонт эштәре ике йыл дауам иткән (Мишкә, Баҡалы, Бөрө райондарында һәм Стәрлетамаҡта) һигеҙ мәктәп һәм Стәрлебаш районындағы ике мәктәп. Тағы һигеҙ мәктәптә ремонт эштәре тамамланған тиерлек, әлеге ваҡытта эшселәр етешһеҙлектәрҙе бөтөрөү менән шөғөлләнә.

«Башинформ» яҙғанса, мәктәптәрҙе капиталь төҙөкләндереү буйынса федераль программаны тормошҡа ашыра башлағандан алып Башҡортостан федераль ҡаҙнанан 8 миллиард 610 миллион һум йәлеп иткән. Ремонт яһалған мәктәптәрҙең һаны буйынса республика Рәсәйҙә икенсе урында тора.

«Былтыр яңыртылған 63 мәктәпкә 21 меңгә яҡын уҡыусы барҙы. Быйыл 16,6 мең бала белем алған 77 мәктәптә ремонт башҡарыла. 2026 йылға тиклем республикала бөтәһе 365 белем усағын  капиталь ремонтлау планлаштырыла. Ике йылда 140 мәктәпте төҙөкләндерҙек», - тип белдергәйне Радий Хәбиров мәғариф буйынса республика август кәңәшмәһендә.

Хәтерегеҙгә төшөрәбеҙ, Башҡортостанда ярты миллион бала, шул иҫәптән 54 мең беренсе класс уҡыусыһы өсөн яңы уҡыу йылы башлана. Белем көнөнә арналған тантаналы линейкалар 1 сентябрҙә була.

https://www.bashinform.ru/news/social/2023-08-29/v-bashkirii-1-sentyabrya-v-obnovlennye-posle-kapremonta-shkoly-poydut-okolo-17-tysyach-shkolnikov-3410582