Салауат Юлаев исемендәге батальонға көн һайын 20-нән ашыу ғариза ҡабул ителә

Башҡортостанда Салауат Юлаев исемендәге икенсе батальон штабы көн дә үҙенең сафына инергә теләүселәрҙән 20-нән ашыу ғариза ҡабул итә. Был хаҡта республика етәксеһенең Рәсәй милли гвардияһы ғәскәрҙәре менән үҙ-ара эш итеү буйынса кәңәшсеһе, Төньяҡ Кавказдағы хәрби хәрәкәттәрҙә ҡатнашҡан отставкалағы полковник Артур Йомағужин хәбәр итте. Уның һүҙҙәренсә, Салауат Юлаев исемендәге икенсе батальон составында махсус хәрби операция зонаһында хеҙмәт итергә теләүселәр күп. Уларҙың һаулығы яҡшы, хөкөмгә тарттырылмаған булыуы шарт.

Батальонға 2023 йылдың 7 сентябренә тиклем яҙылырға мөмкин. «Башинформ» мәғлүмәт агентлығы хәбәр иткәнсә, кандидаттар араһында Эске эштәр министрлығы хеҙмәткәрҙәре күберәк. Башлыса Төньяҡ Кавказда, Афғанстанда, шулай уҡ махсус хәрби операцияла ҡатнашыусылар.

Рәсәй Милли гвардияһының Башҡортостан Республикаһы буйынса идаралығынан хәбәр итеүҙәренсә, контракт буйынса махсус хәрби операцияла ҡатнашыусыларға командировканың бер көнөнә - 4240 һум, 31 көнгә - 131 440 һум, 3 айға 394 320 һум түләнә.

Хәрби хеҙмәт осоронда Рәсәй Федерацияһы ордены (миҙалы) менән бүләкләнгән яугирҙәргә бер тапҡыр биш оклад, ай һайын — хәрби дәрәжә буйынса окладтан 50%, контракт төҙөгәндә бер тапҡыр 195 мең һум түләйҙәр. Бынан тыш, контрактсылар өҫтәмә социаль льготаларға һәм хәрби хеҙмәткәрҙәргә, уларҙың ғаилә ағзаларына гарантияларға, «хәрби хәрәкәттәр ветераны» статусын алыуға һәм льготалы торлаҡ менән тәьмин итеүгә иҫәп тота ала.

Салауат Юлаев исемендәге икенсе батальон сафына инеү өсөн подразделение штабына мөрәжәғәт итергә кәрәк: Өфө, Дан бульвары, 6 (ДОСААФ бинаһы). Кандидаттар 55 йәшкәсә һәм яҡшы физик формала булырға тейеш. Ҡыҙыҡһындырған һорауҙарҙы 7 (987) 023-76-00 телефоны буйынса бирергә мөмкин.

https://www.bashinform.ru/news/svo/2023-08-29/v-bashkirii-batalon-imeni-salavata-yulaeva-ezhednevno-prinimaet-ne-menee-20-zayavok-3410752