Бензинға йәнә хаҡ күтәрелгән

Башҡортостанда «Башнефть» яғыулыҡ  ҡойоу станцияһында йәнә бензинға хаҡтарҙың артыуы күҙәтелә. Урындағы халыҡ хәбәр итеүенсә, быйылғы йәйҙә хаҡ унынсы тапҡыр күтәрелә.

Бөгөндән АИ-100-К5 яғыулығының хаҡы 62,65 һумға тиклем артты, ә ATUM-95 — 52,65 һумға тиклем, АИ-92 — 48,80 һумға тиклем, ATUM-92 — 49,60 һумға тиклем, дизель яғыулығы — 58,20 һумға тиклем күтәрелде. Шул уҡ ваҡытта төбәктең киң  мәғлүмәт саралары мәғлүмәттәре буйынса, республиканың федераль монополияға ҡаршы хеҙмәтендә бензинға хаҡтарҙы арттырыуҙа ҡағиҙә боҙоуҙар табылмаған. Яғыулыҡҡа хаҡ күтәрелеүен яңы һатып алыу хаҡының артыуы менән аңлаталар.

Башҡортостандың сауҙа һәм хеҙмәттәр министрлығында бынан алда «Башинформ» ға бензинға ваҡлап һатыу хаҡтарының үҙгәреү сәбәбе хаҡында һөйләнеләр. Ведомство быны биржа хаҡтарының артыуына бәйләй.