Радий Хәбиров яңыртылған Аксаков баҡсаһының башҡа парктарҙан айырмаһы хаҡында һөйләне

Башҡортостан Башлығы Радий Хәбиров Өфөләге Аксаков исемендәге баҡсаны төҙөкләндереү барышы менән танышты. Республика етәксеһе билдәләүенсә, йәмәғәт киңлеге баш ҡалалағы башҡа ял итеү урындарынан күпкә айырылып торасаҡ. 

«Бынан алда эштән Совет майҙанына Шайморатов генералға һәйкәл ҡуйыуҙы ҡарарға ҡаса инем.) Ә хәҙер эштән Аксаков исемендәге баҡсалағы төҙөкләндереү эштәре менән танышыу өсөн ҡасам.)) Бында барыһы ла һәйбәт. Бөтә биләмәне тәртипкә килтерәбеҙ. Был парк Башҡортостанда беҙ төҙөкләндергән башҡа ял итеү урындарынан айырылып торасаҡ — ул бик уңайлы һәм йәмле буласаҡ. Аксаков исемендәге баҡса беҙҙең халыҡҡа оҡшар тип ышанам», — тип яҙҙы социаль селтәрҙә Радий Хәбиров.

Ул шулай уҡ баҡсаны асыу тантанаһы 11 октябрҙә — Республика көнөндә үтәсәге хаҡында яҙҙы.