Бөрйән районында «Йәштәр йыйыны – 2023» Волга буйы федераль округы йәштәре форумы үтә

Бөрйән районында 22 августан 25 авгусҡа тиклем «Йәштәр йыйыны – 2023» Волга буйы федераль округы йәштәре форумы үтә. Унда Волга буйы федераль округынан, шулай уҡ Мәскәүҙән, Санкт-Петербургтан, Свердловск, Силәбе һәм Ҡурған өлкәләренән йәштәр ҡатнаша. 

Улар өсөн бер нисә йүнәлеш буйынса мәғариф-мәҙәни программа әҙерләнгән. Атап әйткәндә, ҡыҙҙар-егеттәр мәктәп һәм студенттар үҙидаралығы, медиатрендтар, социаль селтәрҙә эшләү, ауыл ерендә йәшәүҙе һәм эшләүҙе популярлаштырыу, «Атайсал» йәш яҡташтар берләшмәһен һәм йәштәр сәйәсәтен үҫтереү хаҡында һөйләште.

Кисә форум майҙансығына Башҡортостан башлығы Радий Хәбиров килде. Йәштәр сәйәсәте буйынса дәүләт комитеты рәйесе Яна Гайдук форум сиктәрендә Йәштәр эштәре буйынса федераль агентлығының Бөтә Рәсәй йәштәр проекттары конкурсы үтеүе хаҡында һөйләне.

Форум ҡатнашыусылары шулай уҡ «На высоте» ижад фестивалендә һәм студенттарҙың беренсе республика туристик слетында ҡатнаша. «ОбъективНО» беренсе ҡыҫҡа метражлы йәштәр киноһы фестивале һәм «Этника» йәш дизайнерҙар коллекциялары конкурсы.

«Ысын күңелдән әйтәм! Һеҙ – донъялағы иң яҡшы йәштәр. Был шаштырыу түгел, ысынлап та шулай. Һеҙ иң аҡыллылары, иң яҡшылары, иң дөрөҫтәре. Бәлки, ҡайһылыр осраҡта дөрөҫ тә түгелһегеҙҙер, әммә һеҙ бынан тик яҡшыраһығыҙ ғына.

Беҙ һеҙҙән олораҡ һәм ниндәйҙер вазифалар биләйбеҙ. Беҙ ысынында һеҙҙе бик яратабыҙ. Ысын күңелдән һеҙҙең тормошоғоҙ бәхетле, сағыу һәм үҙегеҙ ғорурланырлыҡ булыуын теләйбеҙ. 

Һеҙ – дәүләт, беҙҙең тыуған Башҡортостаныбыҙҙың терәге. Һеҙ беҙҙең ҡулдан байраҡты алып, республиканы һәм илде тик алға барырһығыҙ тип ышанабыҙ. Үҫешегеҙ, ижад итегеҙ, юғалып ҡалмағыҙ, һеҙҙең барыһы ла килеп сығасаҡ», - тине Башҡортостан Башлығы.