Танылған йырсы Ришат Төхвәтуллиндың тыуған төйәгендә – хәйриә концерты

Билдәле эстрада йырсыһы, Башҡортостандың һәм Татарстандың атҡаҙанған артисы Ришат Төхвәтуллин тыуған төйәгендә – Туймазы районының Ҡарамалы-Ғөбәй ауылында «Йәйге осрашыуҙар-2023» тигән опен-эйр ойошторҙо. Концертта Әнүәр Нурғәлиев, Марат Яруллин, Әлиә Ҡарасурина, Фирҙәт Ғәлиев һәм башҡа башҡорт, татар эстрадаһы йондоҙҙары ҡатнашты.

«Башинформ»ға билдәле булыуынса, Ришат Төхвәтуллин «Атайсал» проектында ҡатнашып, бер нисә йыл инде хәйриә кисәһен үткәрә. Билет һатыуҙан йыйылған аҡса уның тыуған төйәге өсөн изге эштәргә һәм проекттарға тотонола. Ошо ваҡыт эсендә Ҡарамалы-Ғөбәй ауылы мәсетен, балалар баҡсаһын, урындағы мәҙәниәт йортон төҙөкләндереүҙә ярҙам күрһәтелгән. Йырсы мөмкинлектәре сикләнгән балалар тәрбиәләгән бер нисә ғаиләгә лә ярҙам иткән – дауалау өсөн аҡса күсергән.

Хәтерегеҙгә төшөрәбеҙ, «Атайсал» проекты республика етәксеһенең тәҡдиме менән 2022 йылда эшләй башланы. Уның асылы шунда: яҡташтарыбыҙ тыуған төйәгендә изге эштәр ҡыла. Проекттың дауамы итеп быйыл Башҡортостанда Атайсал өсөн файҙалы эштәр йылы тип иғлан ителде.

https://www.bashinform.ru/news/social/2023-08-01/izvestnyy-pevets-iz-bashkirii-rishat-tuhvatullin-provel-na-maloy-rodine-blagotvoritelnyy-kontsert-3368623