21 йәше тулған етем балалар торлаҡ сертификаты алыу мөмкинлегенә эйә

Дәүләт Думаһы шаршамбы, 19 июлдә, икенсе һәм өсөнсө уҡыуҙарҙа етем һәм ата-әсә ҡарауынан мәхрүм ҡалған балаларҙың торлаҡ һатып алыу йәки ипотека кредитын ҡаплау өсөн түләүгә хоҡуғы тураһында закон ҡабул итте.

Думаның барлыҡ фракциялары депутаттары әҙерләгән төҙөтмәләргә ярашлы, етем һәм ата-әсә ҡарауынан мәхрүм ҡалған балалар, 21 йәше тулғас, торлаҡ сертификатын алырға мөмкин (әгәр быға тиклем ил субъекттарында ошондай нормалар ҡаралған булһа).

Шулай уҡ етем балалар — махсус хәрби операцияла ҡатнашыусылар һәм үҙҙәре ата-әсә булып, әсәлек капиталын торлаҡ һатып алыу өсөн файҙаланырға йыйыныусылар сертификат алыуҙа өҫтөнлөклө хоҡуҡҡа эйә.

Тәүҙә закон проектында 23 йәш тип билдәләргә тәҡдим ителгәйне.

«Торлаҡ сертификаттары етем балаларҙы торлаҡ менән тәьмин итеү проблемаһын хәл итеүҙә һөҙөмтәле булыуын күрһәтте, күпселек төбәктәрҙә ошондай программалар тормошҡа ашырыла. Йәш сиген 21 йәшкә тиклем кәметеү хоҡуғы төбәктәргә етемдәрҙе торлаҡ менән тәьмин итеү бурысын һөҙөмтәлерәк хәл итергә мөмкинлек бирер», - тине Дәүләт Думаһы спикеры Вячеслав Володин.

«Башинформ» 2022 йылда Башҡортостанда 945 етем һәм ата-әсә ҡарауынан мәхрүм ҡалған баланың торлаҡ менән тәьмин ителеүе тураһында яҙғайны.

https://www.bashinform.ru/news/social/2023-07-20/deti-siroty-smogut-poluchit-zhilischnyy-sertifikat-pri-dostizhenii-imi-21-goda-3347482