Рус география йәмғиәтенең Башҡортостан бүлексәһе илдең иң яҡшы ун бүлексәһе иҫәбенә инде – Радий Хәбиров

Бөгөн Рус география йәмғиәтенең Башҡортостан бүлексәһе ышаныслы рәүештә Рус география йәмғиәтенең иң яҡшы ун бүлексәһе иҫәбенә инә. Беҙҙең бүлексәне йәмғиәттең юғары наградаларының береһе – көмөш миҙал менән бүләкләнеләр. Беҙ илдә – йәмғиәттең ошондай юғары наградаһын алған икенсе төбәк.

Был турала Башҡортостан Башлығы Радий Хәбиров Рус география йәмғиәте төбәк бүлексәһенең попечителдәр советы ултырышында белдерҙе.

«Рус география йәмғиәтенең Башҡортостан бүлексәһе федераль акцияларҙа ҡатнашып ҡына ҡалмай, үҙ проекттары менән дә сығыш яһай, урындағы бүлексәләр араһында грант конкурстары үткәрә. Республиканың иҫтәлекле урындары менән таныштырыуҙың ҡыҙыҡлы форматтары барлыҡҡа килә, туристик һуҡмаҡтар йыһазландырыла, интерактив карталар булдырыла, география уҡытыусылары экспедициялары хатта Арктикаға ла барып етә. Киләсәктә башҡорт-белорус зубрҙары ла туристик маршруттарға инер тип уйлайым», - тине Радий Хәбиров.

Былтыр беҙҙең республикала 910 «Географик диктант» майҙансығы ойошторолдо, был иһә ил күләмендә абсолют рекорд, тип билдәләне Башҡортостан Башлығы.

https://www.bashinform.ru/news/social/2023-07-04/bashkirskoe-otdelenie-rgo-vhodit-v-desyatku-luchshih-otdeleniy-strany-radiy-havbirov-3326793