Башҡортостанда йәшәүселәрҙе хәмерһеҙ шәмбе көтә

Башҡортостанда 27 июндә билдәләнгән Йәштәр көнө июнь айының һуңғы шәмбеһенә күсерелде. Башҡортостан Дәүләт Йыйылышы депутаттары май аҙағында тейешле закон ҡабул иткәйне. Шуға күрә алкоголде берәмләп һатыу тәртибе лә үҙгәрҙе.

«Быға тиклем Йәштәр көнөндә (27 июндә), шулай уҡ уның менән бәйле байрам сараларын үткәргән көндә хәмер һатыу тыйылғайны, — тип билдәләне Дәүләт Йыйылышы рәйесе Константин Толкачев. — Хәҙер иһә бер көн генә спиртлы эсемлектәр һатырға ярамай. Быйыл июндең һуңғы шәмбеһе 24-енә тура килә.Тимәк, был шәмбе республикала хәмер һатылмай. Бындай сикләү дөйөм туҡланыу предприятиеларына: кафе-ресторанға һәм башҡаларға ҡағылмай».

Башҡортостан парламенты спикеры һүҙҙәренсә, муниципалитеттарҙың объектив сәбәптәр буйынса Йәштәр көнөн үткәреү өсөн икенсе көндө һайлау хоҡуғы бар. Шуға күрә ҡайһы бер ҡалаларҙа һәм райондарҙа иҫерткес эсемлектәрҙе берәмләп һатыуҙы тыйыу башҡа көндө ғәмәлдә була. Мәҫәлән, быйыл Саҡмағош районында Йәштәр көнөн йома, 23 июндә, билдәләйҙәр, шуға был көндө районда спиртлы эсемлектәр менән сауҙа итеү тыйыла.

Өфөлә, Башҡортостандың күпселек муниципаль берәмектәрендәге кеүек үк, Йәштәр көнө 24 июндә уҙғарыла.

https://www.bashinform.ru/news/social/2023-06-21/zhiteley-bashkirii-ozhidaet-bezalkogolnaya-subbota-3308322