Башҡортостанда Тажикстанға туризм мөмкинлектәре тикшерелде

Башҡортостанға эш сәфәре менән Тажикстан делегацияһы килде. Яҡтарҙың туристик ҡеүәте менән таныштырыу сараһы «Торатау» конгресс-холында үтте. «Тажикстан курорттары», «Ориент Адвентур» ойошмалары етәкселәре үҙ компанияларының мөмкинлектәре тураһында һөйләне.

«Беҙҙең күп өлкәләрҙә, шул иҫәптән ғәмәлдәге проекттарҙа һәм тауар әйләнешендә Тажикстан менән яҡшы мөнәсәбәттәр булдырылған, хәҙер туристик бәйләнештәрҙе лә киңәйтәбеҙ», — тип билдәләне Башҡортостан хөкүмәтенең беренсе вице-премьеры Рөстәм Моратов.

Шулай уҡ яҡтар туристик инфраструктураны үҫтереүгә инвестициялар йәлеп итеү мәсьәләһен тикшерҙе. Тажикстан вәкилдәре хәбәр итеүенсә, илдә инвесторҙар өсөн льготалар, мәҫәлән, биш йыл дауамында өҫтәлгән хаҡҡа һалымдан азат итеү һәм башҡа ташламалар ҡаралған.

Осрашыу Башҡортостан менән Тажикстан туроператорҙары араһында хеҙмәттәшлек тураһында килешеүҙәргә ҡул ҡуйыу һәм быйыл сентябрҙә Дүшәнбе ҡалаһында туристик форумда һәм күргәҙмәлә ҡатнашырға саҡырыу менән тамамланды.

https://www.bashinform.ru/news/social/2023-05-22/v-bashkirii-obsudili-perspektivy-turizma-v-tadzhikistan-3268156