Башҡортостанда оҫта ҡуллы ҡатын-ҡыҙҙар «Шайморатов папахаһы» тегә

Стәрлебаш районының «Үҙебеҙҙекеләр өсөн тегәбеҙ» оҫтаханаһында, хәрбиҙәрҙең үтенесе буйынса, легендар дивизия командиры Миңлеғәле Шайморатовтыҡы кеүек папаха тегә башлағандар.

«Башинформ» агентлығына проекттың кураторы Эльвира Хәмиҙуллина һөйләүенсә, был идеяны оҫтахана ирекмәндәренең береһе Илнара Дәүләтшина тәҡдим иткән. Әйткәндәй, уның ире һәм бер туған ағаһы өлөшәтә мобилизацияға эләккән.

Оҫтабикәләргә кәрәкле материалдар — тире, эслек өсөн туҡыма менән ауылдаштары ярҙам иткән. Күмәкләп бер нисә папаха тегеп, тыуған яғына ялға ҡайтҡан ике яугиргә бүләк иткәндәр.

«Кире бәйләнеш бар, күптәр ошондай бүләк тураһында хыялланған икән, бик ҡыуандыҡ. Шуға күрә киләсәктә, мөмкинлек булһа, шундай баш кейемдәре тегербеҙ, тибеҙ», — ти Эльвира Хәмиҙуллина.

https://www.bashinform.ru/news/svo/2023-01-24/v-bashkirii-masteritsy-volontery-nachali-otshivat-shaymuratovskie-papahi-3117132