Республикала йәшәү минимумы һәм хеҙмәткә түләүҙең минималь күләме артты

Башҡортостан Хеҙмәт министрлығының матбуғат хеҙмәте хәбәр итеүенсә, 1 ғинуарҙан йәшәү минимумы, эшләмәгән пенсионерҙар өсөн страховка пенсиялары һәм хеҙмәткә түләүҙең минималь күләме арттырыла. 2022 йыл өсөн индексация ике этапта – 2022 йылдың 1 июненән 10% һәм 2023 йылдың 1 ғинуарынан уҙҙы, тип билдәләнә. Шулай итеп, 1 ғинуарҙан страховка пенсиялары тағы 4,8%, йәшәү минимумы – 3,3%, ә хеҙмәткә түләүҙең минималь күләме 6,3% артты.

2023 йылдың 1 ғинуарынан эшләмәгән граждандар өсөн ҡартлыҡ буйынса страховка пенсияһының уртаса күләме 21 864 һум була.  

Башҡортостанда йән башына йәшәү минимумы – 12 650 һум, эшкә һәләтле халыҡҡа – 13 789 һум, пенсионерҙарға – 11 990 һум, балаларға – 12 271 һум.

Минималь эш хаҡы күләме 16 242 һумға етте. Башҡортостанда район коэффициенты (1,15) менән бергә МРОТ – 18678,3 һум, Межгорье ҡалаһында иһә юғары район коэффициенты (1,7) менән бергә иҫәпләгәндә 27 611,4 һум тәшкил итә.

2023-2025 йылдарға Башҡортостанда минималь эш хаҡы тураһында социаль партнерлыҡ яҡтары ҡул ҡуйған килешеүгә ярашлы, 2023 йылдың 1 ғинуарынан республиканың бюджеттан тыш өлкә хеҙмәткәрҙәренә – 19 743 һум, ә бюджет өлкәһе хеҙмәткәрҙәренә 18 678 һум күләмендә минималь эш хаҡы билдәләнә. Башҡортостанда бюджеттан тыш хеҙмәткәрҙәрҙең  минималь эш хаҡы – 12,3%, ә бюджет хеҙмәткәрҙәренеке 6,3% арта.

https://www.bashinform.ru/news/social/2023-01-10/v-bashkirii-dlya-rabotnikov-vnebyudzhetnoy-sfery-minimalnaya-zarplata-sostavlyaet-19-743-rublya-3098857