Башҡортостан Дәүләт Йыйылышы — Ҡоролтай депутаты Булат Йомаҙилов үҙ теләге менән махсус хәрби операцияла ҡатнашырға хәл иткән. Бөгөн, 7 декабрҙә, ул яҡташтары менән бергә хәрби әҙерлек үтеү урындарына юлланды. Уларҙы Өфөнөң Октябрь һәм Совет райондарындағы хәрби хеҙмәткә саҡырыу пункты алдынан оҙаттылар.
«Булат Ғүмәр улы йәй көнө үк алғы һыҙыҡҡа барырға йыйыныуы хаҡында әйткәйне, ләкин объектив шарттар уға быны иртәрәк эшләргә мөмкинлек бирмәне. Уның ҡарарын хөрмәт итәбеҙ һәм хуплайбыҙ. Был, һис шикһеҙ, ысын ир-егет, ысын илһөйәр ҡылығы», — тине төбәк парламенты рәйесе Константин Толкачев.
Был минең конституцион бурысым һәм йөрәгемдең ҡушыуы, тип аңлатты үҙенең ҡарарын халыҡ һайланыусыһы.
«Бөйөк Ватан һуғышында атайым үҙе теләп фронтҡа киткән. Мин дә бөгөн ситтә тороп ҡала алмайым. Был минең конституцион бурысым, Тыуған илемде, үҙ илемдең мәнфәғәттәрен яҡларға бурыслымын. Мин — запастағы офицер, өлкән лейтенант һәм алғы һыҙыҡта булырға тейешмен», — тип иҫәпләй Булат Йомаҙилов.