Бөгөн, 3 ноябрҙә, Өфөлә Халыҡтар берҙәмлеге көнө уңайынан «Хеҙмәт ҡаһарманлығы ҡалаһы» стелаһын асыу тантанаһы уҙҙы.
Бөйөк Ватан һуғышы йылдарында тыл эшсәндәренең батырлығын символлаштырған егерме метрлыҡ объект баш ҡалаға ингән ерҙә автомобиль күперҙәренән уң яҡта, Ағиҙел йылғаһы буйында урынлашҡан.
Тантанала ҡатнашыусыларға һәм ҡунаҡтарға мөрәжәғәт итеп, Башҡортостан Башлығы Радий Хәбиров Миңлеғәле Шайморатов һәйкәле һәм Дуҫлыҡ монументы менән бер рәттән стеланың республика халыҡтарының тарихи хәтерен сағылдырыуын билдәләне.
Республика етәксеһе һүҙҙәренсә, һуғыш балаларының — өлкәндәр менән бер рәттән станоктар артына баҫып эшләгәндәрҙең, ошо ваҡиғаларҙың тере шаһиттарының хеҙмәте баһалап бөткөһөҙ.