Республикала сентябрь урталарында COVID-19 менән сирләү осраҡтарының артыуы көтөлә

Сентябрь урталарында Башҡортостанда COVID-19 йоҡтороу осраҡтарының артыуы ихтимал. Бөгөн «Һаулыҡ һаҡлау сәғәте»ндә Роспотребнадзорҙың Башҡортостан идаралығы етәксеһе Анна Казак ошо хаҡта һөйләне. Уның һүҙҙәренсә, әлегә хафаланырға сәбәп юҡ, ләкин хәҙерҙән үк вакцинация һәм ревакцинация буйынса әүҙем эшләргә кәрәк. Август аҙағында отпускынан һуң эшкә сыҡҡан уҡытыусыларға айырым иғтибар биреү зарур. Анна Казак әйтеүенсә, шулай уҡ августа грипҡа ҡаршы вакцина яһата башлау мөһим.

4 авгусҡа республикала 292 418  коронавирус инфекцияһы осрағы теркәлгән (уҙған тәүлектә тағы 91), тип билдәләне Башҡортостандың һаулыҡ һаҡлау министры Айрат Рәхмәтуллин. Республиканың йоғошло сирҙәр госпиталдәрендә 3 авгусҡа яңы коронавирус инфекцияһын дауалау өсөн 375 койка әҙерләнгән.

Республикаға яңы коронавирус инфекцияһын иҫкәртеү өсөн 3 226 648 вакцина килтерелгән (балалар өсөн 9 430).

Башҡортостанда 3 017 327 кеше – вакцинаның беренсе, ә 2 801 350 кеше ике компонентын да ҡаҙатҡан.

Республика Башлығы хакимиәте етәксеһе Максим Забелин муниципалитет хакимиәттәре башлыҡтарына вакцинация һәм ревакцинация мәсьәләһен шәхси контролдә тоторға ҡушты.

«Һуңынан йәнә сикләү сараларын индерергә тура килмәһен өсөн бөгөндән халыҡҡа прививка яһау менән шөғөлләнергә кәрәк. Үҙегеҙҙән һәм хакимиәттәрегеҙҙән башлағыҙ. Республикала «Спутник V» вакцинаһы етерлек. Республиканың Һаулыҡ һаҡлау министрлығы мәғлүмәттәре буйынса, 267 меңдән ашыу доза бар. Үҙеңде хәүефһеҙ тойоу өсөн мотлаҡ ҡабаттан вакцина эшләтергә кәрәк. Был айырыуса хәүеф төркөмөнә ҡарағандарға — хроник сирҙәре булғандарға ҡағыла», — тип билдәләне Максим Забелин.

https://www.bashinform.ru/news/social/2022-08-04/v-bashkirii-rost-zabolevaemosti-covid-19-prognoziruetsya-v-seredine-sentyabrya-2898402