Бөрйән районының Ырғыҙлы ауылында дөйөм практика табибы офисы барлыҡҡа киләсәк

Бының турала БР Башлығы Радий Хәбиров бөгөн ауыл халҡы менән осрашҡанда белдерҙе. Офис үҙе 2023 йылда асыласаҡ, киләһе йылда ул проектлана башлаясаҡ.

Бөрйән үҙәк район дауаханаһы баш табибы белдереүенсә, медучреждениела эшләргә белгес бар, ауылдың үҙенең ФАП-ы ла бар. Ырғыҙлыға шулай уҡ газ үткәрелә башлаған.

Радий Хәбиров Рәсәй Президенты ҡушыуы буйынса илдә тораҡ пункттарға газ үткәреп бөтөүҙе тамамлау программаһы башланды тип иҫкәртеп үтте. Аҙаҡтан ҡышҡа тиклем Ырғыҙлы ауылының үҙәк урамына асфальт түшәүҙе тамамларға ҡушты

. Республика етәксеһе ауылда вакциналау нисек үткәне тураһында ла ҡыҙыҡһынды. Ырғыҙлылар уға яуап итеп, Бөрйәндә беҙ иң әүҙеме тип яуап ҡайтарҙы.

Әңгәмәлә шулай уҡ Иҫке Собханғол - Мораҡ дөйөм ҡулланылышлы автомобиль юлын капиталь ремонтлау тураһындағы тема ла ҡуҙғытылды. Әле уның торошо ҡәнәғәтләнерлек түгел. Яҙын-көҙөн унан еңел автомобилдә үтеп булмай. Юл участкаһының был өлөшөндәге төҙөлөш-монтажлау эштәренең дөйөм суммаһы 2020 йылғы хаҡтар менән 445 млн һум тәшкил итә. Радий Хәбиров әйтеүенсә әлегә республика бюджетында был күләмдәге аҡса юҡ, төҙөлөш ҙур сығымдар талап итә. Киләһе йылда Мораҡ яғынан 3 км юл асфальтланасаҡ, ҡалған өлөшө иһә тәртиптә тотоласаҡ.