Өфө ихаталарын 140 яңы йыл шыршыһы биҙәй

Өфө властары ихаталарҙа боҙ ҡаласыҡтары һанын арттырыу тураһында ҡарар ҡабул итте. Быйыл ҡыш ҡаланы 140-ҡа яҡын яңы йыл шыршыһы, 80 тау, 55 боҙ ҡаласығы, 22 «пятачок» биҙәй, тип белдерҙе мэрияның матбуғат хеҙмәте. Ихаталарҙың күбеһендә хоккей майҙансыҡтары әҙер, бала-саға хоккей уйнай.

Бындай ҡарар яңы коронавирус инфекцияһы таралған осорҙа халыҡтың күпләп йыйылыуына юл ҡуймаҫҡа мөмкинлек бирер, тип иҫәпләйҙәр ҡалала.

Хәтерегеҙгә төшөрәбеҙ, Өфөлә өс төп ҡала шыршыһы һәм боҙ ҡаласығы була: Салауат Юлаев, Совет майҙандарында – ике пиксель шыршы, Ленин исемендәге майҙанда – Благовещен районынан килтерелгән урман һылыуҡайы. Шулай уҡ баш ҡаланың барлыҡ райондарында һәм үҙәктән алыҫта урынлашҡан биләмәләрҙә – 16 майҙансыҡта шыршылар ҡуйыла, боҙ ҡаласыҡтары төҙөлә. Өҫтәүенә ҙур сауҙа үҙәктәре һәм магазиндар янында яңы йыл шыршылары урынлаштырыла.

2020-2021 йылдарҙағы ҡышҡы осорҙа Өфө ҡалаһында күңел асыу һәм спорт сараларын уҙғарыу майҙансыҡтарының тулы исемлеге бында.