Республикала ирекмәндәр өсөн награда булдырылды

Башҡортостанда «Башҡортостан Республикаһы ирекмәне» наградаһы – почет билдәһе булдырылды, ул йыл һайын ун ирекмәнгә тапшырыла. Башҡортостан Башлығы Радий Хәбиров шундай ҡарар ҡабул итте, указға 27 ноябрҙә ҡул ҡуйылды. Бөгөн республика етәксеһе социаль селтәрҙә былай тип яҙҙы: «Был кешеләр башлыса күләгәлә ҡала, ләкин бер ҙур эш тә уларҙың ярҙамынан тыш башҡарылмай. Тағы ла мөһимерәге – ошо ҡыйыу егет-ҡыҙҙар ауыр минутта тәүгеләрҙән булып ярҙамға килә.

Быйыл беҙҙең ирекмәндәр коронавирус инфекцияһына ҡаршы көрәштә алғы сафта булды. Тотош республика буйынса 63 штабтан биш меңдән ашыу кеше ололарға аҙыҡ-түлек, дарыу ташыны, коммуналь хеҙмәттәр өсөн түләргә ярҙам итте, йылы һүҙҙәрен дә йәлләмәне.

Бөрйән районында урман янғанда ярты меңләгән ирекмәнебеҙ утты һүндереүҙә әүҙемлек күрһәтте, феләкләп һыу ташыны».

Радий Хәбиров, әгәр эпидемиологик хәл мөмкинлек бирһә, тәүге бүләкләүҙең алдағы айҙарҙа үтәсәген хәбәр итте.

Бынан тыш, республикала һаулыҡ өсөн хәүефле өлкәләрҙә ярҙам иткән ирекмәндәрҙе һауыҡтырыу программаһы әҙерләнгән. «Изге эштәр төбәге» Бөтә Рәсәй конкурсында Башҡортостан ирекмәндәрҙең иң яҡшы тәжрибәһен үҫтереүгә гран отто (6,5 миллион һум).

Хәҙер Башҡортостанда 400 ирекмән отряды бар. Ирекмәндәр сафына уларҙың рәсми сайтында ҡушылырға мөмкин.