«Айыҡ ауыл» конкурсының төп еңеүсеһе билдәләнде

Бөтә донъя башҡорттары ҡоролтайы ойошторған «Айыҡ ауыл» республика конкурсына йомғаҡ яһалды. Республика Йортонда еңеүселәрҙе бүләкләү тантанаһы уҙҙы. Беренсе урынды һәм 500 мең һумлыҡ премияны Ейәнсура районының 1010 кеше йәшәгән Башҡорт Үргене ауылы алды.

«10-15 йыл элек Башҡорт Үргененең районда эскелек тамыр йәйгән тигән даны бар ине. Бер йылда байтаҡ эш башҡарылды: иҫерткес эсемлектәр һатыу нөктәләре бөтөрөлдө, уңышһыҙ ғаиләләр шефлыҡҡа алынды. Эш балалар баҡсаһынан башлана, сабыйҙар – өлкән быуын хәстәрлегендә. Балан байрамы, йәрминкәләр, башҡа сағыу саралар халыҡҡа ҡул ҡаушырып ултырырға форсат бирмәй. Бөгөн бында башҡа ауылдарҙан да күсәләр», — тине конкурсы ойоштороусылар.

Икенсе урында – Баймаҡ районы Йылым ауылы. Улар 250 мең һумлыҡ сертификат менән бүләкләнде. Өсөнсө урынды – 150 мең һумлыҡ сертификатты Асҡын районы Ҡарткиҫәк ауылы яуланы.

Наградаларҙы тапшырып, Башҡортостан башлығы Радий Хәбиров халыҡ проектының мөһимлеген билдәләне һәм конкурста ҡатнашҡандарҙың барыһына ла рәхмәт белдерҙе.