Республикала 20 меңдән ашыу кеше ОРВИ менән сирләй

ӨФӨ, 2020 йыл, 28 ғинуар. /«Башинформ» мәғлүмәт агентлығы, Гөлфиә Акулова/. Башҡортостанда уҙған аҙнала 20 916 кеше киҫкен респиратор вирус инфекцияһы менән ауырып киткән.

20 ғинуарҙан 26-һына тиклем республикала сирлеләр һаны 4,3% артҡан. Өфөлә 6 700 кешегә ОРВИ диагнозы ҡуйылған.

«Әлеге ваҡытта республикала киҫкен респиратор вирус инфекцияһы һәм киҙеү менән сирләүҙең эпидемик булмаған кимәле һаҡлана. Ауырыу күрһәткесе эпидемик сиктән 3,5% түбәнерәк, Өфөлә сирҙең өлкәндәр араһында таралыуы иҫәбенә 8% күберәк. Ауырыу йоҡторғандарҙың күбеһе — 17 йәшкәсә балалар», — тип хәбәр иттеләр Башҡортостан Республикаһы буйынса Ҡулланыусылар хоҡуғын яҡлау өлкәһендә күҙәтеү һәм кеше именлеге буйынса федераль хеҙмәттән.