Радий Хәбиров һәм Нюта Федермессер Өфөлә хоспис төҙөлөшөн тикшерҙе

ӨФӨ, 2019 йыл, 2 август. /«Башинформ» мәғлүмәт агентлығы/. Йыл ярымдан Өфөлә 30 урынлыҡ өлкәндәр бүлексәһе һәм 20 урынлыҡ балалар бүлексәһе менән хоспис эшләй башлай. Паллиатив ярҙам учреждениеһы төҙөлөшөн Башҡортостан Башлығы вазифаһын ваҡытлыса башҡарыусы Радий Хәбиров шәхси контроленә алған. «Ышаныс» хоспистарға булышлыҡ күрһәтеү хәйриә фондын ойоштороусы, Мәскәү күп йүнәлешле паллиатив ярҙам үҙәге директоры, Дөйөм Рәсәй халыҡ фронтының Үҙәк штабы ағзаһы Нюта Федермессер республика етәксеһе менән осрашыуҙан һуң журналистарға ошо турала хәбәр итте.

«Был ваҡытлы һәм кешелекле ҡарар. Уның осрашыуҙа түгел, ә алдан әҙерләп ҡабул итеү бик яҡшы, – тине Нюта Федермессер. – Башҡортостанда Рәсәйҙә өр-яңынан төҙөлгән икенсе хоспис була, ул проектлау этабында уҡ бик күп хаталарға юл ҡуймаҫҡа мөмкинлек бирергә тейеш. Был – илдә тупланған тәжрибәне файҙаланыу өсөн үҙенсәлекле мөмкинлек».

Уның һүҙҙәренсә, хоспис дауалап булмаҫлыҡ сирлеләрҙең янындағылар – уларҙың ғаиләләре һәм туғандары өсөн булдырыла. «Хоспис ярҙамынан тыш, улар үҙҙәрен ныҡ ғәйепле һәм бәхетһеҙ итеп тоя. Был шәфҡәт күрһәтеүселәрҙе, йәмәғәтселәрҙе, танылған кешеләрҙе йәлеп иткән медицина-социаль учреждениеның берҙән-бер төрө, көс-ҡөҙрәт һәм һөйөү тупланған урын».