Башҡортостан электрон эшкә яраҡһыҙлыҡ ҡағыҙҙары биреү буйынса алдынғы урынды биләй

ӨФӨ, 2019 йыл, 29 апрель. /«Башинформ» мәғлүмәт агентлығы/. Башҡортостан электрон эшкә яраҡһыҙлыҡ ҡағыҙҙарын индереү йәһәтенән Рәсәй төбәктәре араһында етенсе урынды алды. Бөгөн республикала 255 мең электрон эшкә яраҡһыҙлыҡ ҡағыҙы бирелгән. Көҙ көнө төбәк 21-се урында ине.

«Ваҡытлыса эшкә яраҡһыҙлыҡ осрағына һәм әсәлек менән бәйле мотлаҡ социаль страховкалау буйынса сығымы булған эш биреүселәрҙән 45 проценты электрон эшкә яраҡһыҙлыҡ ҡағыҙҙары менән эшләй. Улар араһында республиканың ҙур предприятиелары ла бар, был Башҡортостандың рәсми эшкә урынлашҡан граждандарының яҡынса 75 процентына электрон эшкә яраҡһыҙлыҡ ҡағыҙы тултырырға мөмкинлек бирә», — тип аңлаттылар республиканың Социаль страховкалау фондында.

Электрон эшкә яраҡһыҙлыҡ ҡағыҙын йышыраҡ Межгорье ҡалаһында, Нуриман, Бөрйән һәм Хәйбулла райондарында бирәләр. Шуны билдәләп үтәйек: Башҡортостандың Социаль страховкалау фонды 2020 йылда тулыһынса электрон системаға күсергә ниәтләй.