Баш ҡалала ҡайҙа сүп-сарҙы эшкәртеүгә тапшырырға мөмкин?

ӨФӨ, 2019 йыл, 25 апрель. /«Башинформ» мәғлүмәт агентлығы/. Башҡортостанда сүп-сар реформаһы тулы ҡеүәттә бара — сүп-сарҙы сығарыу, сорттарға айырыу өсөн операторҙар, тарифтар билдәләнгән, ләкин сүплектәрҙә һәм ҡалдыҡтар йыйыу урындарында әлегә тәртип юҡ. Хәҙер реформа киләсәктә сүп-сар ҡабул итеү һәм эшкәртеү урындарын йыһазландырыуға аҡса йыйыу процесын башлай, әммә беҙ системаның тулы ҡеүәткә эшләп китеүен бер нисә йыл көтөргә кәрәк икәнен аңларға тейешбеҙ.

Битараф булмаған өфөләр хөкүмәттең сүп-сар йыйыу буйынса уңайлы инфраструктура булдырыуын көтмәйенсә, үҙҙәре хәлде үҙгәртергә ҡарар иткән. Инициатив төркөмдәр ҡала халҡынан айырым йыйылған сүп-сарҙы ҡабул итеп, уны икенсел эшкәртеүгә алып бара.

«Башинформ» агентлығы Өфөлә сүп-сарҙы, кәрәкмәгән көнкүреш техникаһын һәм кейем-һалымды утилләштереүгә һәм икенсел эшкәртеүгә тапшырыу урындары тураһында мәғлүмәт әҙерләне.