Өфө аэропортында табылған ҡатын психиатрия дауаханаһына оҙатылған

ӨФӨ, 2019 йыл, 5 апрель. /«Башинформ» мәғлүмәт агентлығы, Гөлфиә Акулова/. Өфө аэропортында табылған ҡатын Базилевкаға республика клиник психиатрия дауаханаһына оҙатылған, тип хәбәр иттеләр Рәсәй Эске эштәр министрлығының Транспортта линиялы идаралығында.

Агентлыҡ хәбәр иткәнсә, 3 апрелдә «Өфө» аэропорты биләмәһендә шәхесте раҫлаған документы булмаған бер ҡатын «Өфө – Внуково» рейсы менән осорға уйлаған. РИА Новости мәғлүмәте буйынса, ул бортҡа ингән, үҙенең урынын таба алмаған, һуңынан уның билеты ла, паспорты ла булмауы асыҡланған.

Ул үҙен Марина Максимова тип таныштыра, атаһының исемен хәтерләмәй. Ҡыҙ фамилияһы – Сёмина. Уның һүҙҙәренсә, ул пенсионер, 1958 йылғы, Иваново өлкәһенең Иваново ҡалаһында йәшәгән. Хаҡлы ялға сыҡҡансы балалар баҡсаһында тәрбиәсе һәм башланғыс кластар уҡытыусыһы булып эшләгән. Өфөгә нисек килеп эләгеүен иҫләмәй. Үҙе әйтеүенсә, үткенсе машиналарға ултырып, Ивановонан Ҡаҙағстандың Усть-Каменогорск ҡалаһына китергә сыҡҡан.

Хәҙер ул медицина учреждениеһында.

Әлегә туғандарынан йәки уны белгән кешеләрҙән хәбәрҙәр юҡ, тип өҫтәнеләр транспорт полицияһында.

Ҡатындың шәхесе тураһында ниндәй ҙә булһа мәғлүмәт белгәндәрҙе 8(347) 273-38-91; 8(347) 229-52-02 телефондарына шылтыратыуҙарын һорайҙар.