Башҡортостан һәм Өфө яңылыҡтары
92.26
-0.33
99.71
-0.56
86.97
-0.03
-3 °C
Болотло
Бөтә яңылыҡтар
Йәмғиәт
27 Март 2019, 11:01

Сибайҙа башҡортса Шаяндар һәм тапҡырҙар клубы фестивале меңдән ашыу тамашасы йыйҙы

ӨФӨ, 2019 йыл, 27 март. /«Башинформ» мәғлүмәт агентлығы/. Сибайҙа 26 мартта «Ирәндек» боҙ һарайында меңләгән тамашасы башҡортса Шаяндар һәм тапҡырҙар клубы фестиваленә йыйылды. Үҙҙәре хаҡында белдереү һәм төп бүләк – Еңеүсе кубогы өсөн көрәшеү өсөн бында бөтә республиканан командалар килде.
Сараны Мәскәү һәм Мәскәү өлкәһенең Үҙәк лигаһы ҡатнашыусылары – «Республика йөҙҙәре» КВН командаһы асты. Улар сағыу һәм дәртле сығыш яһаны. Шаяртыуҙар бер-бер артлы яуып торҙо. Ойоштороусылар һүҙҙәренсә, сибайҙар ҡыҙыҡлы юмор шоуын көтә ине, әлбиттә, ләкин шул хәтле шәп булыр тип уйламағайны — тамашасылар залында ҡыуаныстың, һоҡланыуҙың, көлөүҙең сиге булманы.
Фестивалде башҡорт моделе, халыҡ-ара конкурстар еңеүсеһе Эльвира Ишморатова, Башҡорт асыҡ КВН лигаһы идараһы рәйесе Урал Кәримов, «Бүреләр» төркөмө лидеры Илшат Абдуллин, Башҡортостан юлдаш телеканалы алып барыусыһы һәм хоккей комментаторы Дмитрий Каретко, Сибай ҡалаһының Йәштәр эштәре буйынса комитеты рәйесе Әлфир Вәлитов баһаланы.
«Мин бында килеүемә, ошо байрамдың бер өлөшө булыуыма шатмын. Егеттәр һәм ҡыҙҙар йәмғиәтебеҙҙең нигеҙен күреү генә түгел, был хаҡта шаяртыуҙан да ҡурҡмай. Сибайға ҙур рәхмәт, республика тарихында тәүге тапҡыр Шаяндар һәм тапҡырҙар клубы боҙ майҙансығында уҙҙы, бындай ваҡиғаның бер ҡайҙа булғаны юҡ ине. Беҙҙе ҡабул иткәнегеҙ өсөн рәхмәт», – тине Дмитрий Каретко.
Башҡортса Шаяндар һәм тапҡырҙар клубы фестивалендә «Нөктә.ру» (Өфө) командаһы еңеү яуланы. Икенсе урынды Бөрйән районынан «Бер минут» командаһы алды. Өсөнсө урынды «Әстәғәфирулла» (Башҡорт дәүләт университетының Сибай филиалы) һәм «Ете ырыу» (Сибай медицина колледжы) командалары бүлеште.
Читайте нас: