Өфөлә башҡорт теле һәм әҙәбиәте уҡытыусыларының I Бөтә Рәсәй съезы була

ӨФӨ, 2019 йыл, 11 март. /«Башинформ» мәғлүмәт агентлығы/. 10-12 апрелдә Өфөлә башҡорт теле һәм әҙәбиәте уҡытыусыларының I Бөтә Рәсәй съезы уҙа. Был хаҡта Башҡортостан Мәғариф министрлығының матбуғат хеҙмәте хәбәр итә.

Республиканың 100 йыллығына бағышланған сара «Торатау» конгресс-холы майҙансығында ойошторола. Съезда Башҡортостан Республикаһындағы һәм Рәсәй Федерацияһы субъекттарындағы дөйөм белем биреү ойошмаларының башҡорт теле һәм әҙәбиәте уҡытыусылары; туған телдә уҡытылған дәүләт һәм муниципаль дөйөм белем биреү ойошмалары директорҙары; муниципаль райондар һәм ҡала округтары хакимиәттәренең мәғариф идаралығы (бүлектәре) белгестәре һәм методистары; юғары уҡыу йорттары, йәмәғәтселек вәкилдәре ҡатнаша.

Съезда ҡатнашыусылар Башҡортостанда, Рәсәй төбәктәрендә башҡорт телен һаҡлау, өйрәнеү һәм үҫтереү мәсьәләләрен тикшерергә; Башҡортостанда Туған телдәрҙе уҡытыу концепцияһына тәҡдимдәр индерергә тейеш.

Вице-премьер Ленара Иванова рәйеслегендәге ойоштороу комитеты составына Хөкүмәт, Дәүләт Йыйылышы, Мәғариф министрлығы, Бөтә донъя башҡорттары ҡоролтайы, Сауҙа һәм ҡулланыусылар хоҡуғын яҡлау буйынса дәүләт комитеты, республиканың Фәндәр академияһы, Һаулыҡ һаҡлау министрлығы, Матбуғат һәм киң мәғлүмәт саралары агентлығы, Өфө хакимиәте, Башҡорт дәүләт университеты вәкилдәре инде.