Баш ҡалала кескәй ҡыҙсыҡ төрлө йәрәхәттәр алған балалар баҡсаһы ябылды

ӨФӨ, 2019 йыл, 6 март. /«Башинформ» мәғлүмәт агентлығы/. Өфөнөң Орджоникидзе районы прокуратураһы «Дон-Апельсин» шәхси балалар баҡсаһында тикшереү үткәрҙе. Асыҡланыуынса, уҙған йылдың август аҙағында мәктәпкәсә учреждениеға ҡыҙын алырға килгән әсә уның битендә һәм тәнендә бик күп күгәргән эҙҙәрҙе күреп ҡалған.

«Тәрбиәсе үҙенең бурысына яуапһыҙ ҡараған: ойошмалағы кескәй баланың хәүефһеҙлеген тәьмин итмәгән. Шул сәбәпле уйнаған саҡта бер бала йәш ярымлыҡ ҡыҙыҡайҙы тешләгән», — тип асыҡлыҡ индерҙеләр Башҡортостан прокуратураһында.

Баҡтиһәң, шәхси учреждениела санитар-эпидемиологик һәм янғынға ҡаршы ҡануниәтте боҙоу теркәлгән. Бина автоматик янғын сигнализацияһы һәм янғын тураһында хәбәр иткән прибор менән йыһазландырылмаған, запас сығыу юлы юҡ. Балалар баҡсаһында шулай уҡ аҙыҡ-түлекте һаҡлау шарттары үтәлмәгән, йыуыу һәм дезинфекциялау саралары балалар күрерлек урында һаҡланған, эсәр һыуҙың сифаты тураһында документтар, хеҙмәткәрҙәрҙең медицина кенәгәһендә прививкалар тураһында мәғлүмәттәр булмаған.

Прокуратура балалар баҡсаһы етәксеһенә закон боҙоуҙарҙы бөтөрөргә ҡушҡан, шулай уҡ ғәйеплеләрҙе административ яуаплылыҡҡа тарттырыу өсөн тикшереү материалдарын контролдә тотҡан органдарға ебәргән. Ойошмаға һәм директорға штраф һалынған. Тикшереүҙән һуң учреждение етәкселеге балалар баҡсаһын ябырға хәл иткән.